Qeveria, pensionistët 1.8 miliardë lekë shpërblim për Vit të Ri
Ndryshon Buxheti 2017, miratohet fondi për shpërblimin e pensionistëve Bonusi për fëmijët, pagesat për të lindurit nga viti 2008
Qeveria ndryshon buxhetin e vitit 2017. Në aktin normativ të dorëzuar dje në Kuvend është përcaktuar fondi për bonusin e pensionistëve për festat e fundvitit dhe shuma që do të paguhet për fëmijët e lindur nga vitit 2008 e në vazhdim. Në relacionin që i bashkëlidhet aktit evidentohet nevoja për një ndërhyrje të tillë në kushtet e ristrukturimit të institucioneve. Krahas rialokimit të disa fondeve, në relacion dalin edhe projektet që janë lënë për t'u zbatuar në javët e mbetura të këtij viti. Me ndërhyrjen e realizuar në buxhet, qeveria ka rritur me 1.8 miliardë lekë kontributin nga sigurimet shoqërore dhe shëndetësore, si rrjedhojë e performancës së lartë në mbledhjen e tyre gjatë periudhës janar- shtator 2017. Kjo rritje do të shkojë tërësisht për bonusin e pensionistëve, me një efekt neutral për buxhetin e shtetit. Një ndërhyrje tjetër është ajo e rritjes me 200 milionë lekë të fondit për kompensimin e fëmijëve. Që prej vitit 2008, qeveria ka vendosur një shpërblim 5 mijë lekë për fëmijët e lindur, ashtu sikurse ka edhe një serë përfitimesh të tjera për këtë qëllim, të cilat prej vitesh kanë krijuar borxh për shkak se nuk janë shlyer. E me këtë vendim, qeveria parashikon të shlyejë detyrimet e prapambetura, brenda këtij viti. E sa i përket rritjes së pagave, ndryshimi buxhetor sjell reduktimin me 200 milionë lekë të rezervës për rritjen e pagave. Ky ndryshim argumentohet si rrjedhojë e kursimeve pas akomodimit të të gjitha kërkesave të institucioneve buxhetore.
RRITJA E PENSIONEVE
Në zërat e buxhetit të shtetit tashmë është bërë traditë që të ketë një zë të veçantë për politika të reja
pagash dhe pensionesh. Në projektbuxhetin e vitit të ardhshëm tashmë për rritje pagash është parashikuar një fond prej 1 miliardë lekë. Ministri i Financave dhe Ekonomisë, Arben Ahmetaj u shpreh se mbështetjen më të madhe do e kenë sektorët e arsimit dhe shëndetësisë. Ndërsa në lidhje me rritjen e pensioneve, ku është parashikuar një fond prej 1.8 miliardë lekë, rritja do nisë nga muaji maj i vitit të ardhshëm. Në vitin 2017 qeveria vendosi të rrisë pagat, pas një ndërprerje të kësaj politike për 3 vite. Kështu nga kjo rritje përfituan 110 mijë persona, për
të cilët u akordua një fond nga buxheti i shtetit prej 5,5 miliardë lekë.
NDRYSHIMET
Ministria e Financave dhe Ekonomisë propozon këtë akt normativ me bindjen se ndryshimet e paraqitura sigurojnë arritjen e tre objektivave të rëndësishëm: garantimin e ofrimit të shërbimeve publike, rritjen e frytshmërisë së përdorimit të burimeve publike, rritjen e sigurisë në realizimin e treguesve të buxhetit. "Bazuar në performancën makrofiskale e buxhetore të 10mujorit janar- tetor 2017, si dhe në parashikimin e pritshëm të këtyre treguesve
deri në fund të këtij viti buxhetor, akti normativ konsiston në: ruajtjen e parametrave kryesorë të buxhetit të miratuar në fillim të vitit; deficiti buxhetor mbetet i pandryshuar, ndërkohë që të ardhurat dhe shpenzimet e buxhetit rriten në të dyja kahet me rreth 4,5 miliardë lekë; rialokime brenda zërave të shpenzimeve të buxhetit, me qëllim akomodimin e prioriteteve të qeverisë së re, rritjen e eficencës së treguesve kryesorë makrobuxhetorë, me qëllim arritjen e objektivave deri në fund të vitit 2017"- thuhet në relacionin e aktit normativ të buxhetit të vitit 2017.
Rialokimi i shpenzimeve kapitale, nga projektet me ecuri të ngadaltë tek ato me ecuri të lartë, në rreth 2.4 miliardë lekë në total ( rreth 1.5 miliardë lekë nga Fondi për Zhvillimin e Rajoneve), ku rreth 600 milionë lekë rialokohen në zërin "shpronësime";
Rritja me 352 milionë lekë e fondit për kompensimin e ish- të përndjekurve politikë, me qëllim akomodimin e shlyerjes 100% të këstit të tetë dhe të fundit të kategorisë parësore të përfituesve të gjallë, deri në fund të vitit 2017.
Rritja me 200 milionë lekë të shpenzimeve dedikuar kompensimit të lindjes së fëmijëve, me qëllim likuidimin e detyrimeve të krijuara në këtë zë; rritjen me 200 milionë lekë të zërit "Mirëmbajtje rrugore", me qëllim financimin e detyrimeve ekzistuese të kontratave të mirëmbajtjes së akseve kombëtare;
Rritja me 150 milionë lekë të buxhetit të Ministrisë së Drejtësisë për rikonstruksionin e godinës së Kolegjit të Posaçëm të Apelimit;
Rritja me 127 milionë lekë të shpenzimeve korrente për të përballuar faturat e përfaqësimit të Shqipërisë në çështjet e arbitrazhit të gjykatave ndërkombëtare, me qëllim evitimin e krijimit të detyrimeve të prapambetura;
Rritja me 120 milionë lekë të shpenzimeve të AKSHO- së, me qëllim akomodimin e këstit të radhës së Microsoft- it;
Rritja me 100 milionë lekë të buxhetit të Ministrisë së Mbrojtjes, për përmbushjen e një sërë detyrimeve në kuadër të përfaqësimit në NATO;
Rritja me 100 milionë lekë e transfertës buxhetore për Radiotelevizionin Shqiptar, për mbulimin e shpenzimeve të implementimit të platformës së dixhitalizimit;
Reduktimi me 400 milionë lekë i fondit rezervë për institucionet e vetingut, duke bërë efektiv fillimin e financimit që në buxhetin 2017 të tri institucioneve të reja të tij, përkatësisht Komisionit të Rivlerësimit Kalimtar të Magjistratit; Komisionit të Apelimit të Rivlerësimit Kalimtar dhe Komisionerëve Publikë;
Reduktimi me 200 milionë lekë i rezervës për rritjen e pagave, si rrjedhojë e kursimeve pas akomodimit të të gjitha kërkesave të institucioneve buxhetore;