Gjykata jep "Arrest me burg" për të "fortin" e Shijakut, Durim Keçi
DURRËS - Gjykata e Shkallës së Parë e Durrësit dje vendosi masën e sigurisë "Arrest me burg" me qëllim ekstradimin drejt Italisë të 42- vjeçarit Durim Keçi, i cili u arrestua të mërkurën nga policia. I "forti" nga Shijaku u kap, pasi rezulton në kërkim nga autoritetet italiane për trafik droge, pjesëmarrje në organizatë kriminale dhe shfrytëzim prostitucioni. Seanca gjyqësore ndaj Keçit u zhvillua nën masa të rrepta sigurie. Gjykata ishte "blinduar" që në mëngjes nga forcat e policisë, të cilët nuk lanë të hynte asnjë familjar në sallën e gjyqit. Gjatë fjalës së tij, prokuroi i çështjes, Ilir Turja kërkoi nga gjykata lënien në burg për 42- vjeçarin me pretendimin se, nisur nga dënimi i marrë në Itali ( Gjykata e Gjenovës e ka dënuar me 9.7 vjet burg), ai paraqet rrezikshmëri. Ndërkaq, avokati mbrojtës Ilia Ilia i kujtoi gjykatëses Elda Kaja operacionin e policisë italiane të koduar "Kanun", në zonën e Bergamos në Itali, ku brenda një nate u arrestuan 135 banorë të Shijakut. Sipas tij, u montua një gjyq manipulator dhe diskriminues ndaj shqiptarëve asokohe. "Është proces me natyrë raciste, për shkak të diskriminimit të të qenit shqiptarë. Procesi ka pasur për objekt procedimi 135 shqiptarë nga zona e Shijakut. Në kushtet që kemi vetëm një urdhër pa firmë, pa vulë, nuk plotëson kriteret për të realizuar arrestin në flagrancë", - tha avokati Ilia Ilia. Ndërkaq, ai i kërkoi gjykatëses të lërë të lirë klientin e tij, që sipas tij nuk është arratisur nga Italia, por vetëm është larguar dhe nuk paraqet asnjë rrezikshmëri. Gjykatësja Elda Kaja vendosi ta konsiderojë të ligjshëm arrestimin në flagrancë, ndërsa dha masën e sigurisë "Arrest me burg" të përkohshëm me qëllim ekstradimin drejt vendit fqinj, ku Durim Keçi është i dënuar me vendim të formës së prerë. kl. ha.