Helmohen 50 dasmorë në Shijak, 12 shtrohen në spital
Shefja e Infektivit në Durrës: Janë jashtë rrezikut për jetën. AKU bllokon lokalin deri në daljen e analizave Pacientët u paraqitën me të vjella e temperaturë të lartë një ditë pas dasmës
Rreth 50 persona janë helmuar nga ushqimi që kanë konsumuar në një lokal dasme në Shijak. Personat e helmuar kanë shfaqur probleme shëndetësore ( të vjella, dhimbje barku, diarre dhe temperaturë të lartë) pak orë pasi kishte përfunduar banketi. Shqetësimet për dasmorët kanë nisur pasditen e së hënës, ndërkohë që dje në repartin Infektiv të spitalit rajonal të Durrësit ishin ende të shtruar 12 persona. Burime nga spitali i qytetit bregdetar pohuan se mes personave të shtruar kishte edhe fëmijë. Mësohet se, pasi kanë marrë ndihmën e parë mjekësore, 38 prej tyre janë kthyer në banesat e tyre, ndërsa të tjerët u shtruan, pasi ndodheshin në gjendje më të rënduar shëndetësore. Me kalimin e orëve gjashtë prej tyre u larguan, pasi shëndeti i tyre u përmirësua ndjeshëm, ndërsa gjashtë dasmorët e tjerë vijojnë të qëndrojnë në repartin e Infektivit. Vetë pacientët e shtruar në spitalin e Durrësit u shprehën se "ishim në dasmë dhe u helmuam. Fillimisht nuk kuptuam gjë, pasi problemet me shëndetin na nisën një ditë më pas ( të hënën). Darka në lokalin që kishin prenotuar ishte e mirë, pastërtia në maksimum. Nuk
e dimë se çfarë ndodhi. Hëngrëm, u kënaqëm dhe më pas përfunduam në spital". Menjëherë pas sinjalizimit për helmimin masiv në Shijak, policia e Durrësit ka nisur hetimet për zbardhjen e plotë të kësaj ngjarjeje. "Më datë 13.08.2017, në Shijak, në një lokal në pronësi të shtetasit Dh. K., vjeç 57, në një dasmë janë helmuar shtetasit: E. J., E. J., Dh. J., T. J., Q. K. e B. C., vjeç
55, 32, 42, 49, 57, 43, banues në Durrës, të cilët ndodhen në spital jashtë rrezikut për jetën. Materialet i kaluan Prokurorisë së Rrethit Gjyqësor Durrës, për vlerësim, e cila po zhvillon hetime intensive për të zbardhur ngjarjen e rëndë", thuhej në njoftimin zyrtar të policisë. Ndërkaq, Drejtoria Rajonale Durrës e Autoritetit Kombëtar të Ush- qimit ka bllokuar aktivitetin e lokalit në Shijak. Sipas burimeve nga AKU- ja, lokali do të qëndrojë i bllokuar deri në daljen e analizave përfundimtare, në bazë të të cilave do të merren edhe masat e duhura sipas ligjit.
MJEKËT
Shefja e repartit Infektiv në spitalin e Durrësit, Nadire Jani tha dje se situata është nën kontroll të plotë, ndërsa sqaroi se pacientët janë shfaqur me diarre dhe temperaturë të lartë. Sipas saj, aktualisht situata e tyre është më e mirë. "Të gjithë pacientët janë paraqitur me diarre të shpeshtë, të vjella të shpeshta, temperaturë 3940. U shtruan në spital, u është bërë mjekimi efikas, janë bërë ekzaminimet dhe gjendja e tyre është e mirë". Gjithashtu, mjekja Jani pohoi se pas situatës së krijuar, është lajmëruar Drejtoria e Shëndetit Publik.
Në lidhje me rastin në fjalë, kjo drejtori ka nisur inspektimin e lokalit ku është zhvilluar dasma. Autoritetet shëndetësore kanë kërkuar mostra të ushqimit që kanë konsumuar dasmorët, por nga lokali iu është thënë se janë hedhur në plehra. Në këto kushte, AKU- ja ka bllokuar aktivitetin deri në daljen e rezultatit të analizave toksikologjike. Nëse do të vërtetohet se helmimi është shkaktuar nga ushqimi, pritet që të merren masa administrative ndëshkuese ndaj pronarit të lokalit, i cili aktualisht po procedohet në gjendje të lirë.