Sherri për një vajzë, 17- vjeçari shqiptar vritet me thikë nga një shtetas italian
Miqtë e dy të rinjve: Nuk ishte hera e parë që ziheshin
ITALI - Një shqiptar 17vjeçar u qëllua për vdekje me thikë nga një 19- vjeçar italian. Ngjarja ka ndodhur në Stradela, ku sipas mediave të huaja është raportuar se shqiptari së bashku me autorin, Simone Madaluno- n, pëlqenin të njëjtën vajzë. Po sipas tyre, ka qenë pikërisht kjo gjë edhe "molla e sherrit" mes dy të rinjve. Sherri ka nisur të dielën në diskotekë, dhe më pas ka vijuar edhe pasditen e djeshme. Shqiptari dhe italiani kanë lënë një pikë takimi për t'u "sqaruar", dhe aty janë përleshur sërish me njëritjetrin. Në sherr e sipër, sipas dëshmitarëve është pohuar se italiani Madaluno ka nxjerrë thikën dhe e ka goditur shqiptarin në kraharor, duke e lënë atë të plagosur rëndë, dhe fatkeqësisht ndërroi jetë pak orë më vonë në spital. Kanë qenë banorë të zonës ata që lajmëruan autoritetet italiane, të cilët mbërritën në vendin e ngjarjes dhe nisën hetimet për të zbuluar edhe shkaqet e plota të saj. Ndërkohë që autoritetet italiane arrestuan në flagrancë 19- vjeçarin italian, si dhe sekuestruan në cilësinë e provës materiale edhe armën e krimit.
DËSHMITARËT
Mediat italiane raportuan dje, se në sajë të dëshmive të dhëna nga ana e dëshmitarëve, thuhej se kjo nuk ishte hera e parë që dy të rinjtë ziheshin me njëri- tjetrin. "Nuk ishte hera e parë që ata ziheshin me grushte me njëri- tjetrin, por nuk e mendonim kurrë se gjërat do të shkonin deri në këtë pikë", - janë shprehur dje dëshmitarët, pas ngjarjes së rëndë, ku mbeti i plagosur me thikë 17- vjeçari shqiptar, pas sherrit që kishte pasur për një femër, me një djalë të ri italian. Sipas mediave italiane, të njëjtën gjë kanë pohuar edhe miqtë e tyre, të cilët kanë deklaruar se dy djemtë e rinj janë konfliktuar edhe herë të tjera. Ata u morën në pyetje në polici, si persona që mund të kenë dijeni për krimin e rëndë, si dhe për të hedhur dritë rreth ngjarjes së rëndë. "Ata u ndeshën në një vend që e frekuentonin të dy. Panë me një vështrim sfidues njëritjetrin. Nuk dihet, ndoshta kishin lënë takim për të sqaruar gjërat, ndoshta edhe mund të jenë takuar rastësisht në atë vend", kanë treguar dje në polici miqtë e autorit të krimit, si dhe miqtë e shqiptarit që mbeti i vrarë me thikë.