Pakti me PD, PDIU merr dhe “Rezervat e Shtetit”
Pakti me PD- në, do të drejtojë edhe Komitetin e Diasporës I jepet dhe n/ drejtori i ALUIZN- it e AKKP
Marrëveshja për bashkëqeverisje mes PD- së dhe PDIU- së shtrihet edhe në tri drejtori të rëndësishme, atë të ALUIZNI- it, AKKP- së dhe Rezervat e Shtetit. Burime brenda dy partive, PD- së dhe PDIU- së konfirmuan dje për “Gazeta Shqiptare”, se Petrit Çerçizi është emëruar drejtor i Rezervave të Shtetit, Hekuran Halili merr detyrën e nëndrejtorit të përgjithshëm të ALUIZNI- it, Ariana Demi, nënkryetare e Agjencisë së Kthimit dhe Kompensimit të Pronave. Pak ditë më parë PDIU mori dhe drejtimin e INSIG.
Nga ana tjetër është çështje ditësh, krijimi i Komitetit Kombëtar i Diasporës të cilin do ta drejtojë PDIU. Mësohet se deri tani është studiuar modeli i disa vendeve dhe i është përqasur modelit italian. Kreu i PDIU- së Shpëtim Idrizi është shprehur i kënaqur nga zbatimi i deritanishëm i marrëveshjes me PD- në e cila përfshin katër zëvendësministra e disa drejtori kyçe, përfshi edhe atë të Sigurimeve Shoqërore. “Pasi mbaruan zgjedhjet ne kemi dizajnuar një marrëveshje që ka të bëjë me 4 zv. ministra. Jo se kjo është e kënaqshme nga ana jonë, por pas 70 vjetësh për herë të parë shteti shqiptar do të ketë zv. ministra nga ky komunitet. Kemi marrë deri tani 3 drejtori të përgjithshme, po diskutojmë edhe 2- 3 të tjera. Ne nuk e kemi kondicionuar qëndrimin tonë në mazhorancë me postin e zv. ministrit. Nga mënyra se si po ecën marrëveshja ne nuk jemi të kënaqur, mund të ecte me shpejtësi shumë më të madhe. Realizimi i këtyre apo i rezolutës çame, që është një kërkesë imperative dhe shumë e rëndësishme e jona, do të kondicionojë kënaqësinë apo pakënaqësinë tonë. Nëse do të flasim për postet, nuk jemi të kënaqur. Nëse flasim për programin, bërja e Komitetit të Diasporës, varrezat e Kllogjerit, muzeu i Hasan Tahsinit, mbi të gjitha miratimi i rezolutës çame në Parlament, janë elemente shumë të rëndësishme të këtij vlerësimi”, - ka deklaruar z. Idrizi. Por, kreu i PDIU- së herë pas here ka vënë në dukje se kësaj partie i takon një post ministror duke përjashtuar mundësinë që vet ai të jetë pjesë e kabinetit “Berisha”.